കൊറോണ കാലത്തെ ഒരു സംഘി ചതി

കൊറോണ വ്യാപനത്തിന്റെ ആദ്യനാളുകളിൽ മഹാമാരിക്കെതിരെ പോരാടാൻ ഉറച്ചുപോരാടിയ കേരളത്തിന്റെ ധീരവനിത—'കടത്തനാട്ടു മാക്കം' എന്ന് വിശേഷിപ്പിക്കപ്പെട്ട നമ്മുടെ ടീച്ചറമ്മയെ, രാഷ്ട്രീയ പടക്കളത്തിൽ ചുരികയെറിഞ്ഞു വീഴ്ത്തിയ ചതിയുടെയും തന്ത്രങ്ങളുടെയും കഥയാണിത്. അന്ന് കൊറോണയെ പിടിച്ചുകെട്ടാൻ ഊണും ഉറക്കവും ഉപേക്ഷിച്ച്, അഹോരാത്രം കണ്ണിലെണ്ണയൊഴിച്ച് കാത്തിരുന്ന വാർത്തകൾ കാട്ടുതീ പോലെ ലോകരാജ്യങ്ങളാകെ പടർന്നുപിടിച്ചു. വാർത്ത കേട്ട് ലോകനേതാക്കന്മാർ ഞെട്ടിത്തരിച്ചു! എന്തിന്, വൈറസിന്റെ പ്രഭവകേന്ദ്രമായ വുഹാനിലെ വൈറോളജി ഇൻസ്റ്റിറ്റ്യൂട്ടിലെ ശാസ്ത്രജ്ഞർ പോലും അന്തിച്ചുനിന്നു. ലോകശക്തികൾ തങ്ങൾ സൃഷ്ടിച്ച കൊറോണയെക്കണ്ട് കളംവിട്ടോടുമ്പോൾ, കേരളത്തിന്റെ സ്വന്തം മാക്കം ഒറ്റയ്ക്ക് മഹാമാരിയെ വധിക്കുമോ എന്ന ആശങ്കയിലായിരുന്നു മറ്റു രാജ്യങ്ങൾ. "കഷ്ടം! ഇതുപോലൊരു ഭരണാധികാരിയെ നമുക്ക് കിട്ടിയില്ലല്ലോ" എന്ന് താടിക്ക് കയ്യുംകൊടുത്ത് വ്യാകുലപ്പെട്ട ലോകരാജ്യങ്ങൾ, ടീച്ചറമ്മയെ തങ്ങളുടെ നാട്ടിലേക്ക് ക്ഷണിച്ച് പ്രസിഡന്റോ പ്രധാനമന്ത്രിയോ ആക്കുന്നതിനെക്കുറിച്ച് കൂലംകഷമായി ചിന്തിച്ച നിമിഷങ്ങളായിരുന്നു അത്. ചൈനയിലെ പ്രമുഖ പത്രങ്ങൾ പോലും ഫ്രണ്ട് പേജിൽ ഈ കമ്മ്യൂണിസ്റ്റ് ധീരവനിതയെക്കുറിച്ച് വാതോരാതെ എഴുതിയത് ലോകം അത്ഭുതത്തോടെ നോക്കിക്കണ്ടു. ടീച്ചറമ്മയുടെ പ്രശസ്തി അഖിലാണ്ഡമണ്ഡലമാകെ പടരുന്നത് കണ്ടപ്പോൾ എതിരാളികളായ സംഘപരിവാർ പ്രൊഫൈലുകൾക്ക് അസൂയ മൂത്തു. പിന്നെ വൈകിയില്ല, സൈബർ സഖാക്കളെക്കാൾ ഒരുപടി മുന്നിൽക്കയറി അവരും ടീച്ചറമ്മയെ വാഴ്ത്തിപ്പാടാൻ തുടങ്ങി. ഇന്ന് എതിർചേരിയിൽ നിൽക്കുന്ന പലരും പണ്ട് കമ്മ്യൂണിസ്റ്റ് കളരിയിൽനിന്ന് പഠിച്ചിറങ്ങിയവരാണെന്ന സത്യം മറക്കരുതല്ലോ! അവിടെയാണ് തന്ത്രത്തിന്റെ തുടക്കം. പാർട്ടിയുടെ അടവുനയങ്ങൾ മനഃപാഠമാക്കിയ എതിരാളികൾ ഒരു കുതന്ത്രം മെനഞ്ഞു; ടീച്ചറമ്മയെ കേരളത്തിന്റെ "ഭാവി മുഖ്യമന്ത്രി" എന്ന് വിശേഷിപ്പിച്ചു! ഇത് ജർമ്മനിയിൽ പണ്ട് ഹിറ്റ്‌ലർ വിജയകരമായി പരീക്ഷിച്ച തന്ത്രത്തിന് സമാനമായ ഒരു രാഷ്ട്രീയ നീക്കമാണെന്ന് തിരിച്ചറിയാൻ താഴെത്തട്ടിലെ അണികൾക്ക് കഴിഞ്ഞില്ല. അവർ ആ പ്രയോഗം സോഷ്യൽ മീഡിയയിലാകെ വ്യാപകമായി പ്രചരിപ്പിച്ചു. എന്നാൽ ഈ "ഭാവി മുഖ്യമന്ത്രി" പട്ടം അങ്ങ് മുകളിൽ നിൽക്കുന്ന "മുണ്ടുടുത്ത മുസോളിനിക്കും" അദ്ദേഹത്തിന്റെ അനുയായികൾക്കും അത്ര രസിച്ചില്ല. ഫലമോ? അഖിലാണ്ഡ നേതാവായി വാഴിക്കപ്പെടേണ്ടിയിരുന്ന ടീച്ചറമ്മയുടെ അടുത്ത മന്ത്രിസഭയിലെ സ്ഥാനവും സ്വപ്നങ്ങളും ഭ്രൂണാവസ്ഥയിൽത്തന്നെ രക്തസാക്ഷിത്വം വരിച്ചു! ഈ രക്തസാക്ഷിത്വത്തിന്റെ പാപഭാരം ഏതു പമ്പയിൽ മുങ്ങിക്കുളിച്ചാലും തീർക്കാനാകില്ലെന്നതാണ് ചരിത്രം. ass="separator" style="clear: both; text-align: center;">